梁家俊贏一級賽全場感動!港隊國際賽執3W!

作者:Jamie 發表日期:2017-12-10 18:03:12

沙田馬場全場感動!今日國際賽大盛事日,第七場香港一哩錦標一級賽跑千六米路程,港隊奪標希望、港產騎師梁家俊胯下的「美麗傳承」,在全場馬迷雷聲打氣之下,直路愈放愈有,最終氣走對手,贏得呢場總獎金2,300萬嘅大賽!

首度揚威一級賽的梁家俊,賽後非常激動,接受我哋《東網》記者訪問時更加眼濕濕添呀!而家俊梗係有多謝練馬師大摩、「美麗傳承」馬主給予咁寶貴嘅出賽機會!梁家俊仲話第一次贏國際賽真係好興奮,佢知道隻馬嘅準備好好,自己亦都做足功課,今場佢喺450米開始發力,因為知道隻馬唔會停,亦希望啲競爭對手唔好咁快追到上黎,結果真係成功贏馬!

而就快做爸爸嘅佢,贏完大賽唔係諗住點樣慶祝,而係想第一時間返屋企,同佢位靚靚老婆阿Kit食飯,大肚中嘅阿Kit雖然未能親身到場見證老公贏一級賽,但聽到家俊嘅講,一定好Sweet喇!

哈唔,今日國際賽,港隊其實又點止梁家俊「美麗傳承」一隻威吖!仲有邊個?香港練馬師蔡約翰訓練嘅「紅衣醒神」,幫本地贏香港短途錦標先拔頭籌,而另外重頭戲香港盃,更加係由另一位港產練馬師告東尼訓練嘅「馬克羅斯」贏出,港隊國際賽一日贏三W,真係勁到無倫!香港好嘢!


本文來源:http://hk.on.cc/hk/bkn/cnt/sport/20171210/bkn-20171210171526556-1210_00882_001.html




Tag:
本文鏈接:http://www.networkmanufacturer.com/54307.html